Like WITH ME

Feb 7, 2011


ប្រាសាទ​ព្រះវិហារ​កំពុង​ប្រឈមមុខ​នឹង​គ្រោះថ្នាក់ 
ក្នុងពេល​ភាពតានតឹងផ្នែក​យោធា​រវាង​កម្ពុជា​និង​ថៃ​កំពុង​មាន​កម្រិត​ខ្ពស់
ប្រាសាទ​ព្រះវិហារ​ កំពុង​ប្រឈមមុខ​នឹង​គ្រោះថ្នាក់ ក្នុងពេល​ភាពតានតឹងផ្នែក​យោធា​រវាង​កម្ពុជា​និង​ថៃ​កំពុង​មាន​កម្រិត​ខ្ពស់
©AFP
ដោយ សេង ឌីណា
ការវាយប្រយុទ្ធគ្នា​រវាង​កងទ័ព​ខ្មែរ និង​ថៃ ចាប់តាំង​ពី​ថ្ងៃ​សុក្រ ៤​កុម្ភៈ ២០១១​​រហូត​មកទល់​ពេលនេះ បាន​បណ្តាល​ឲ្យ​ប្រាសាទ​ព្រះវិហារ​ត្រូវ​ទទួល​រងនូវ​ការខូតខាត​យ៉ាង​ដំណំ។ អាជ្ញាធរ​កម្ពុជា​បានអះអាង​ថា ការខូតខាតនេះ គឺ​បណ្តាល​មក​ពី​ការបាញ់ផ្លោង​របស់​ទាហាន​ថៃ។ វត្ត​កែវសិក្ខាគិរីស្វារៈ ដែល​នៅក្បែរប្រាសាទ​ក៏​ត្រូវ​ទទួលរង​គ្រាប់ផ្លោង​របស់​ថៃ បណ្តាល​ឲ្យ​ខូចខាត​យ៉ាងធ្ងន់ធ្ងរដែរ។ ទង្វើ​របស់​ថៃ​នេះ គឺ​ជា​ការ​រំលោភ​ទៅលើ​ច្បាប់​សង្រ្គាម ដែល​អាច​ចាត់បញ្ចូល​ជា​ឧក្រិដ្ឋកម្ម​សង្រ្គាម។


 
 

“ច្បាប់សង្រ្គាម” គឺ​មាន​ចែង​នៅ​ក្នុង​អនុសញ្ញា​ក្រុង​ឡាអេ​ (១​នៅ​ឆ្នាំ​១៨៩៩ និង​១ទៀត​នៅ​​ឆ្នាំ​១៩០៧) និង​អនុសញ្ញា​ក្រុង​ហ្សឺណែវ​ចំនួន​៤ (ឆ្នាំ​១៩៤៩)។ ច្បាប់​សង្រ្គាម គឺ​ត្រូវ​យក​មក​អនុវត្ត​ទាំងក្នុង​ករណី​មាន​សង្រ្គាម និង​ក្នុង​ករណី​មាន​ជម្លោះ​ប្រដាប់​អាវុធ​អន្តរជាតិ (ដោយ​គ្មាន​ការ​ប្រកាស​​សង្រ្គាម​ជាមុន)។ ការរំលោភ​លើ​ច្បាប់​សង្រ្គាម​នេះ នឹង​ត្រូវ​ចាត់បញ្ចូល​ជា​បទឧក្រិដ្ឋ​សង្រ្គាម ដែល​មាន​ចែង​នៅ​ក្នុង​​មាត្រា ៨ នៃ​លក្ខន្តិកៈ​ក្រុង​រ៉ូម ស្តីពី​ការបង្កើត​តុលាការ​ព្រហ្មទណ្ឌ​អន្តរជាតិ។

យោងតាម​មាត្រា ៨ ត្រង់ចំណុច​ទី​៩ នៅក្នុង​​ពេល​មាន​ជម្លោះប្រដាប់អាវុធ​ជា​អន្តរជាតិ ការ​វាយប្រហារ​ដោយ​ចេតនា​ទៅលើ​អគារ ដែល​ជាទីកន្លែង​សម្រាប់​គោរពបូជា​សាសនា ឬ​ទៅលើ​អគារ​ប្រវត្តិសាស្រ្ត​ណាមួយ​ នឹង​ត្រូវ​ចាត់ទុក​ថា​ជា​បទឧក្រិដ្ឋសង្រ្គាម លើកលែងតែ​អគារ​ទាំងនោះ ត្រូវ​បានប្រើប្រាស់​ជា​ទីតាំង​ទ័ព។

កងទ័ព​ថៃ​បាន​ធ្វើ​ការ​បាញ់ផ្លោងមក​លើ​ប្រាសាទព្រះវិហារ ទាំងដឹង​ច្បាស់​អំពី​ទីតាំង​របស់​ប្រាសាទ។ ម្យ៉ាងទៀត មន្រ្តី​យោធាកម្ពុជា​បាន​អះអាង​ថា កងទ័ព​កម្ពុជា​មិនបាន​ប្រើប្រាស់​បរិវេណ​ប្រាសាទ​ព្រះវិហារ ជា​ទីតាំង​ទ័ព ដើម្បី​វាយប្រហារ​ទៅលើ​កងទ័ព​ថៃនោះទេ។ ដូច្នេះ ទង្វើ​របស់​កងទ័ព​ថៃ​ ដែល​បាញ់ផ្លោង​លើ​ប្រាសាទ​ព្រះវិហារ គឺ​អាច​ត្រូវ​ចាត់ចូល​ជា​ឧក្រិដ្ឋកម្ម​សង្រ្គាម។

មានទង្វើ​ជាច្រើន​ទៀត ដែល​​មានចែង​ក្នុង​លក្ខន្តិកៈ​ក្រុងរ៉ូម ​ថាជា​ឧក្រិដ្ឋកម្ម​សង្រ្គាម​ផងដែរ ជាអាទិ៍​៖
  • ការវាយប្រហារ ការបាញ់ផ្លោង ឬ​ការទម្លាក់​គ្រាប់បែក​ទៅលើ​ក្រុង ភូមិ ទីប្រជុំជន ​ទីលំនៅ​ ឬ​អគារ ដែល​គ្មាន​ការ​ការពារ និង​ដែល​មិនមែន​ជា​ចំណុចស៊ីប​របស់​កងទ័ព (មាត្រា ៨.៥ នៃ​លក្ខន្តិកៈ​ក្រុងរ៉ូម)។
  • ការប្រើថ្នាំពុល ឬ​អាវុធ​ដែល​មាន​ជាតិពុល (មាត្រា ៨.៧)។
  • ការប្រើឧស្ម័ន​ពុល ឬ​សារធាតុ​ប្រហាក់ប្រហែល​ផ្សេងទៀត (មាត្រា ៨.៨)។
  • ការប្រើប្រាស់​ប្រភេទ​អាវុធ​ដែល​ត្រូវ​ហាមឃាត់​ដោយ​ច្បាប់​អន្តរជាតិ (មាត្រា ៨.​១០) ដូចជា គ្រាប់បែក​ចង្កោម​ជាដើម ដែល​ត្រូវ​ហាមឃាត់​ដោយ​អនុសញ្ញា ស្តីពី​គ្រាប់បែក​ចង្កោម ចូលជាធរមាន កាល​ពីឆ្នាំ​២០០៨។
ជនណា​​​ដែល​ប្រព្រឹត្ត​បទឧក្រិដ្ឋកម្មសង្រ្គាម បើទោះជា​​ប្រមុខរដ្ឋ​នៃ​ប្រទេសមួយ​ក៏ដោយ ក៏​អាច​ត្រូវ​នាំខ្លួន​យក​ទៅ​កាត់ទោស​នៅ​តុលាការ​ព្រហ្មទណ្ឌ​អន្តរជាតិ (ក្រុងឡាអេ) បាន​ដែរ។ ម្យ៉ាងទៀត តុលាការ​ព្រហ្មទណ្ឌ​អន្តរជាតិ​​អាច​បើកការស៊ើបអង្កេត និង​ធ្វើ​ការ​​ចោទប្រកាន់​​អំពី​បទឧក្រិដ្ឋ​សង្រ្គាម​បាន ដោយ​មិន​ចាំបាច់​មាន​​​ការព្រមព្រៀង​ពី​​សំណាក់​គូភាគី​ ដូចក្នុង​ករណី​តុលាការ​យុត្តិធម៌​អន្តរជាតិ​នោះទេ៕

Feb 1, 2011

អំបែង​គ្រាប់​កំាភ្លើង​ថៃ​ 
បាន​បំផ្លាញ​ប្រាសាទ​ព្រះវិហារ​យ៉ាង​ដំណំ​

© សុវណ្ណារ៉ា
ដោយ អ៊ឹម ណាវិន
ជញ្ជាំង​ប្រាសាទ​ព្រះវិហារ​កាន់ស្លែ រាប់​រយ​ឆ្នាំ​មាន​ពណ៌​ខ្មៅ​ប្រផេះ បាន​របេះ​សាច់​ខ្មៅ​ខាង​ក្រៅ​ចេញ ធ្វើ​អោយ​គេ​មើល​ឃើញ​ស្នាម​ពណ៌​សៗ ពាសពេញ​ប្រាសាទ ប្រៀប​ដូច​ជា​ខ្លួន​មនុស្ស ដែល​មាន​ស្នាម​ដំបៅ មិន​ទាន់​សះ ពេញ​ដង​ខ្លួន។


សាច់ ​ថ្ម​ប្រាសាទ នៅ​កន្លែង​ខ្លះ​បាន​របេះ​ចេញ ទំហំ​ប៉ុន​ប្រអប់​ប្រេង​កូឡា រីឯ​កន្លែង​ខ្លះ​របេះ​សាច់​ខ្មៅ​ចេញ ឃើញ​សាច់​ស មាន​ទំហំ​រហូត​ប៉ុន​ចាន​ឡូ ដូច​គេ​យក​ពូថៅ​ទៅ​កាប់​។ ប៉ុន្តែ ស្លាក​ស្នាម​ប្រេះ​បែក​ទំាង​អស់​នោះ​មិនមែន​ស្នាម​ពូថៅ​កាប់​នោះ​ទេ វា​គឺ​លទ្ធផល នៃការបាញ់​ដោយ​​គ្រាប់​កំាភ្លើង​របស់​ទាហានថៃ។

ជញ្ជាំង​​ជណ្តើរ​ប្រាសាទ ផ្នែក​ខាង​ស្តាំ ចាប់ពី​គូបារ៉ាក់​ទី​៥ រហូត​ដល់​គូប៉ារ៉ាក់​ទី​១ សុទ្ឋតែ​មាន​ស្នាម​របេះ។​ កន្លែង​ទទួល​រង​អំបែង​គ្រាប់​ច្រើន​ជាង​គេ គឺ​នៅ​ត្រង់​ចំណុច​គូបារ៉ាក់​ទី​១ ទី​៣ និង​ទី​៥។

សំបុត្រ​របស់​លោក​សុខ អាន​ឧប​នាយករដ្ឋមន្រ្តី​ផ្ញើ​ជូន​លោកស្រី Irina Bokova អគ្គនាយក​អង្គការ​យូនេស្កូ
ក្បាល ​នាគ នៅ​ចន្លោះ​រវាង​គូបារ៉ាក់​ទី​៥ ទៅ​ទី​៤ បាន​របេះ​សាច់​ចេញ​មួយ​ចំហៀង​មុខ ធ្វើ​អោយ​បាត់បង់​ទម្រង់​មុខ​សត្វ​នាគ។ សសរ ប្រាសាទ​ត្រង់​គូបារ៉ាក់​ទី​៥ បាន​បែក​​មួយ​ចំហៀង។

កន្លែងដែល​​គ្រាប់​កំាភ្លើង​ថៃ​ធ្លាក់​ផ្តាច់​ជីវិត អ្នក​ប្រកប​របរ​ថតរូប​អោយ​ភ្ញៀវ​ទេសចរ​ម្នាក់ នៅ​ចំណុច គូបារ៉ាក់​ទី​៥ បាន​ទម្លាយ ​កម្រាល​ប្រាសាទ ទៅ​ជា​រណ្តៅ​ធំ​ប៉ុន​ភ្លៅ​មនុស្ស និង​មាន​ជម្រៅ​ជិត​មួយ​ចំអាម​ដៃ។

សំបុត្រ​របស់​លោក​សុខអាន​ផ្ញើ​ជូន​ប្រធាន​ គណៈកម្មាធិការ​បេតិកភណ្ឌ​ពិភពលោក​
បន្ថែម ​ពី​លើ​អ្វី​ដែល​គេ​បាន​មើល​ឃើញ​មុន​ការ​ប្រយុទ្ឋ​គ្នា​យ៉ាង​ខ្លំាងក្លា រវាង​កងទ័ព​កម្ពុជា និង​កងទ័ព​ថៃ មួយ​ប្រាវ​ទៀត​កាលពី​យប់​ថ្ងៃ​អាទិត្យ និង ព្រឹក​ថ្ងៃចន្ទ​ទី ៧ កុម្ភៈ​នេះ។
ភ្លាមៗ​ក្នុង​ថ្ងៃ​ចន្ទ​ដដែល​នេះ អង្គភាព​ព័ត៌មាន និង​ប្រតិកម្ម​រហ័ស​ នៃ​ទីស្តីការ​គណៈរដ្ឋមន្រ្តី បាន​ចេញ​សេចក្តី ប្រកាស​ព័ត៌មាន​ជារួម​ថា​ផ្នែក​ខ្លះ​នៃ​ប្រាសាទ​ព្រះវិហារ ពិសេស​ចំណុច​គូបារ៉ាក់​ទី​១ ទី​៣ និង​ទី​៥ ត្រូវ​បំផ្លាញ​យ៉ាង​ដំណំ​ដោយ​អាវុធ​របស់​ភាគី​ថៃ។

អ្នក​ជំនាញ​វត្ថុ​បុរាណ​នៅ​កម្ពុជា កំពុង​បូក​សរុប​ពី​ការ​ខូចខាត ប្រាសាទ​ព្រះវិហារ​ជា​ផ្លូវការ​ហើយ​​លទ្ធផល​លំអិត​ពី​ការ​ខូចខាត ប្រាសាទដែល​ជា​​បេតិកភណ្ឌ​ពិភពលោក​នេះ នឹង​ចេញ​ជា​ផ្លូវការ​ក្នុង​ពេល​ខាង​មុខ​នេះ៕

Comment about my Post

 
Copyright (c) 2010 WITH ME. Design by Wordpress Themes.

Themes Lovers, Download Blogger Templates And Blogger Templates.