ដកស្រង់ចេញពីវិទ្យុបារាំងអន្តរជាតិ (RFI) សុក្រ 30 កញ្ញា 2011
សៀវភៅដែលចោទខៀវ សំផន
© តាំង ហ្សង់-ហ្វ្រង់ស្វ័រ
Khieu Samphan et les Khmers rouges ឬ«ខៀវ សំផននិងពួកខ្មែរក្រហម» គឺជាចំណងជើងនៃសៀវភៅដែលទើបតែចេញលក់ នៅប្រទេសបារាំងកាលពីថ្ងៃព្រហស្បតិ៍ទី២៩កញ្ញាម្សិលមិញ។ សៀវភៅសរសេរជាភាសាបារាំងមួយនេះរបស់លោកRaoul Marc Jennar គឺជាប្រតិកម្មមួយឆ្លើយតបទៅនឹងអ្វីដែលអ្នកនិពន្ធហៅថា«ជាការ ភូតភរកុហកសុទ្ធសាធ» និងជាការសើរើប្រវត្តិសាស្រ្តពីសំណាក់មេខ្មែរក្រហមខៀវ សំផននិងមេធាវីរបស់ខ្លួនហ្សាក់ វែរហ្សែស(Jacques Vergès)។
សៀវភៅ របស់Raoul Marc Jennar គឺជាសម្រែកមួយប្រឆាំងនឹងមេខ្មែរក្រហមខៀវ សំផន គឺជាការឆ្លើយតបរបស់អ្នកឯកទេសម្នាក់ដែលចេះចាំស្ទាត់ ប្រវត្តិសាស្រ្តខ្មែរទៅនឹងសេចក្តីថ្លែងការណ៍និងការសរសេរផ្សេងៗ របស់ខៀវ សំផន ប៉ុន្មានឆ្នាំចុងក្រោយនេះ។ ពីព្រោះ ក្នុងពេលរង់ចាំទទួលការកាត់ទោស អតីតប្រមុខរដ្ឋនៃរបបខ្មែរក្រហមរូបនេះបានថ្លែងនិងបានសរសេរ ដោះសាម្តងហើយម្តងទៀតថា ខ្លួនមិនបានដឹងអ្វីទាល់តែសោះ អំពីការកាប់សម្លាប់រង្គាល និងមិនបានរួមចំណែកសោះឡើយក្នុងការសម្រេចនិងការអនុវត្តន៍បន្ទាត់ នយោបាយធំៗនៃរបបកម្ពុជាប្រជាធិបតេយ្យ។
ខៀវ សំផនបានប្រកែកដោះសាថា ខ្លួនមិនមែនជាមេខ្មែរក្រហមទេ តែជាបញ្ញវន្តម្នាក់ដែលបានបង្ខំចិត្តចាកចេញពីភ្នំពេញទៅជ្រក ក្រោមកិច្ចការពាររបស់ពួកមេខ្មែរក្រហមនៅក្នុងព្រៃតែប៉ុណ្ណោះ។
ទាំង នេះសុទ្ធសឹងជាពាក្យភូតភរកុហក បើយោងទៅតាមRaoul Marc Jennar។ អ្នកនិពន្ធសៀវភៅ«ខៀវ សំផននិងពួកខ្មែរក្រហម»ដែលយកឯកសារនិងទឡ្ហីករណ៍ជាមូលដ្ឋាន បានសរសេរលាតត្រដាងថា ខៀវ សំផនជាមេកុម្មុយនិស្តសុទ្ធសាធ ដ្បិតជាសមាជិក និងក្រោយមកទៀតជាប្រធាននៃក្រុមនិស្សិតខ្មែរMarx-Lénineនិយមនៅ ទីក្រុងប៉ារីស ជាសមាជិកនៃបក្សកុម្មុយនិស្តបារាំងក្នុងទសវត្សរ៍ទី៥០ ជាមុខមាត់ស្របច្បាប់ ពោលគឺជាតំណាងរាស្រ្ត ដូច ហ៊ូ យន់ និងហ៊ូ នឹម ដែលបម្រើបក្សកុម្មុយនិស្តកម្ពុជាមិនស្របច្បាប់ក្នុងទសវត្សរ៍ទី៦០ ស្គាល់ប៉ុល ពត តាំងពីទសវត្សរ៍ទី៤០ ស្និទ្ធនឹងប៉ុល ពតតាំងពីដើមដល់ចប់និងមានផ្នត់គំនិតមនោគមវិជ្ជា និងនយោបាយដូចប៉ុល ពតបេះបិទ។
មិនតែប៉ុណ្ណោះ សម្រាប់Raoul Marc Jennar ខៀវ សំផនជាខួរក្បាលរបស់ប៉ុល ពត ដោយហេតុថានយោបាយដែលរបបកម្ពុជាប្រជាធិបតេយ្យបានអនុវត្ត រួមមានជាអាទិ៍ការប្រែក្លាយប្រជាជនសឹងទាំងស្រុងនៅទូទាំងប្រទេស ឲ្យទៅជាកសិករ នយោបាយខ្លួនទីពឹងខ្លួន ការបង្កើតសហករណ៍ និងការប្រែក្លាយរាល់សម្បត្តិនិងមធ្យោបាយឯកជនឲ្យទៅជាកម្មសិទ្ធិ សមូហភាពទាំងស្រុង សុទ្ធសឹងជាគោលគំនិតដែលខៀវ សំផនបានសរសេរនៅក្នុងនិក្ខេបបទថ្នាក់បណ្ឌិតរបស់ខ្លួននៅឆ្នាំ ១៩៥៩។
Raoul Marc Jennar បានជម្រុញការវិភាគរបស់គាត់ទៅឆ្ងាយជាងនេះទៅទៀត ដោយអះអាងថា ការយកទ្រឹស្តីរបស់ខៀវ សំផន មកធ្វើជាស្នូលនយោបាយ មកអនុវត្តទាំងងងឹតងងល់បែបនេះ គឺជាបុព្វហេតុមួយសំខាន់នៃការបណ្តាលឲ្យស្លាប់មនុស្សច្រើនដល់ ម្ល៉ឹង។ ត្រង់នេះ ខៀវ សំផនបានទាំងសរសេរនៅក្នុងនិក្ខេបបទរបស់ខ្លួនថាអ្វីដែលគួរឲ្យ តម្លៃ«គឺមិនមែនបុគ្គលទេ តែគឺជាតិទៅវិញទេ» បានន័យថា ស្លាប់មនុស្សក៏ស្លាប់ទៅចុះឲ្យតែជាតិរស់។
ស្រោចស្រង់ ជាតិ ការពារបូរណភាពទឹកដី…នេះហើយសុទ្ធសឹងជាមូលហេតុ បើយោងទៅតាមសំដីរបស់ ខៀវ សំផន ដែលបានជម្រុញឲ្យខ្លួនគាត់ដើរតាមនិងគាំទ្រពួកខ្មែរក្រហមដែល គាត់យល់ឃើញថា ជាកម្លាំងស្នេហាជាតិតែមួយគត់។
Raoul Marc Jennar ដែលពឹងផ្អែកទៅលើឯកសារជាច្រើន លាតត្រដាងថារាល់សេចក្តីសម្រេចចិត្តធំៗនៃរបបកម្ពុជាប្រជាធិបតេយ្យ សុទ្ធតែត្រូវបានធ្វើឡើងដោយមានការចូលរួមនិងការគាំទ្រពិត ប្រាកដពីសំណាក់ខៀវ សំផន។
ខៀវ សំផនតែងតែតាំងខ្លួនជាអ្នកស្នេហាជាតិ។ តាមរយៈសេចក្តីថ្លែងការណ៍ និងបទសម្ភាសន៍ផ្សេងៗ ជាអាទិ៍ជាមួយវិទ្យុRFI ខៀវ សំផនតែងតែអះអាងថា អ្វីដែលខ្លួនបានធ្វើគឺមានគោលដៅតែមួយគត់នោះគឺស្រោចស្រង់ជាតិ។
Raoul Marc Jennar សរសេរឆ្លើយតបនៅក្នុងសៀវភៅរបស់គាត់ទៅខៀវ សំផនវិញថា «សូមកុំឲ្យប្រជាជនក្នុងពិភពលោកជួបអ្នកសេ្នហាជាតិដូចខៀវ សំផនឲ្យសោះ» ពីព្រោះពាក្យស្នេហាជាតិ សម្រាប់មនោគមវិទូខ្មែរក្រហមរូបនេះ គឺ«ប្រែក្លាយប្រជាជនខ្លួនឲ្យទៅជាទាសករ បង្អត់អាហារប្រជាជនខ្លួននិងសម្លាប់ចោលទាំងអស់អ្នកណាក៏ដោយដែល មិនមានគំនិតដូចខ្លួន»។
មិនតែប៉ុណ្ណោះ Raoul Marc Jennar សរសេរថា ការស្នេហាជាតិរបៀបខៀវ សំផន ក៏ដូចការស្នេហាជាតិរបៀបពួកមេខ្មែរក្រហមដទៃទៀតដែរ គឺជាគំនិតដែលមនុស្សជាតិមិនត្រូវការទេ ដ្បិតវាមានមូលដ្ឋាននៅលើពូជសាសន៍ នៅលើការប្រកាន់ពូជសាសន៍ នៅលើការសម្រាំងយកតែពូជសាសន៍ខ្មែរសុទ្ធសាធ និងវាមានមូលដ្ឋាននៅលើការអាឡោះអាល័យចំពោះដែនដីសម័យអង្គរដែលបាន បាត់បង់ជាច្រើនសតវត្សរ៍កន្លងមកហើយ។ អ្នកនិពន្ធបន្ថែមថា គំនិតស្នេហាជាតិរបៀបខ្មែរក្រហម របៀបខៀវ សំផន ដូចមានឧទាហរណ៍ជាច្រើននៅក្នុងប្រវត្តិសាស្រ្តស្រាប់ តែងតែនាំទៅរកសង្គ្រាមទៅរកការកាប់សម្លាប់រង្គាល។
ក្រៅ ពីនេះ នៅក្នុងសៀវភៅដែលមានចំណងជើងថា Khieu Samphan et les Khmers rouges ចេញផ្សាយដោយគ្រឹះស្ថានបោះពុម្ភDemopolis, Raoul Marc Jennar ចោទខៀវ សំផនចំតែម្តងថា បានសម្រេចដោយចេតនាក្នុងការយកកេរ្តិ៍ឈ្មោះដ៏ល្អរបស់ខ្លួន ក្នុងនាមជាបញ្ញវន្តប្រកបដោយកិត្យានុភាពខ្ពស់ ក្នុងនាមជាអ្នកសារព័ត៌មានប្រកបទៅដោយឥទ្ធិពលខ្លាំង និងក្នុងនាមជាអ្នកតំណាងរាស្រ្តសែនសាមញ្ញដែលរាស្ត្រស្រឡាញ់និង គោរព ទៅបម្រើទ័ពព្រៃកុម្មុយនិស្តសាហាវយង់ឃ្នង និងរបបនយោបាយថោកទាប ព្រៃផ្សៃនិងអមនុស្សធម៌របស់ប៉ុល ពត៕