WITH ME

Oct 7, 2011

Steve Jobs បិតាបង្កើតIphone Ipod Ipad ស្លាប់ក្នុងវ័យ៥៦ឆ្នាំ

ដក់ស្រង់ពីវិទ្យុបារាំងអន្តរជាតិ ថ្ងៃព្រហស្បតិ៍ 06 តុលា 2011

ទំព័រមុខវិបសៃត៍ក្រុមហ៊ុនApple ប្រកាសមរណភាពរបស់អ្នកដ៏មានទេពកោសល្បបង្កើតIpad Iphone Ipod

©Reuter

ដោយ ឈាង បុប្ផា
Steve Jobs សហស្ថាបនិកក្រុមហ៊ុនApple និងជាមនុស្សមានទេពកោសល្បមិនធ្លាប់មាន បានផ្លាស់ប្តូររបៀប ប្រើប្រាស់កុំព្យួទ័ររបស់មនុស្សសម័យថ្មី។ ក្នុងយុគសម័យព័ត៌មានវិទ្យាទំនើប Steve Jobsប្រើគំនិតជំនួញរបស់ខ្លួន ដើម្បីច្នៃប្រឌិតយកបទចម្រៀង កុនមកដាក់បញ្ចូលក្នុងទូរស័ព្ទដែលកន្លងមក អាចប្រើសម្រាប់ត្រឹមមធ្យោបាយ ទាក់ទងគ្នា។ ជាអកុសល គំនិតថ្មីៗរបស់ Steve Jobs បានបញ្ចប់ត្រឹមថ្ងៃពុធទី ៦ តុលា ២០១១ នៅពេលក្រុមគ្រួសារបានប្រកាសមរណភាពរបស់ Steve Jobs ដែលស្លាប់ដោយមហារីកលំពែង។

ប្រវត្តិរបស់Steve Jobs រៀបរៀងដោយឈាង បុប្ផា

06/10/2011 by ឈាង បុប្ផា

Steve Jobsកើតនៅឆ្នាំ ១៩៥៥ ក្នុងទីក្រុងSan Francisco។ ម្តាយបង្កើតរបស់ Steve Jobs ដែលមានផ្ទៃពោះ ក្នុងពេលខ្លួនជានិស្សិតបានសម្រេចផ្តល់ Steve Jobsឲ្យធ្វើជាកូនចិញ្ចឹមរបស់អ្នកដទៃ។ ឪពុកម្តាយបង្កើតរបស់ Steve Jobsក៏បានរៀបការនឹងគ្នា ក្រោយរៀនចប់មហាវិទ្យាល័យ និងបង្កើតបានកូនស្រីម្នាក់។ ប្អូនស្រីរបស់ Steve Jobsទើបតែស្គាល់បងប្រុសរបស់ខ្លួន នៅក្នុងពេលធំពេញវ័យទៅហើយ។ នៅក្នុងសន្និសីទមួយ Steve Jobsបាននិយាយរំលឹកពីប្រវត្តិរបស់ខ្លួន។

ទទួលចិញ្ចឹមដោយប្តីប្រពន្ធ ត្រកូលJobs Steve Jobsធំដឹងក្តីនៅភាគខាងត្បូងទីក្រុងSan Francisco។ Steve ធ្លាប់រត់លេង ក្នុងចម្ការផ្លែAbricots ដែលក្រោយមកបានប្រែក្លាយជាជ្រលងភ្នំSilicon Valley កន្លែងអភិវឌ្ឍន៍ជឿនលឿនព័ត៌មានវិទ្យារបស់កាលីហ្វ័រនី។

នៅវិទ្យាល័យ Steve ឧស្សាហ៍ចូលទៅស្តាប់សន្នីសីទដែលរៀបចំឡើងដោយក្រុមហ៊ុនអេឡិចត្រូនិក HP (Hewlett-Packard) ដែលក្រោយមកបានប្រែក្លាយជាក្រុមហ៊ុនផលិតកុំព្យូទ័រ។ នៅវិសម្សកាលរដូវក្តៅម្តងៗ Steve Jobsតែងតែធ្វើការស្រាវជ្រាវជាមួយSteve Wozniak ដែលជាវិស្វករព័ត៌មានវិទ្យា។

Steve Jobs ចូលរៀនមហាវិទ្យាល័យបានត្រឹមតែមួយឆមាស មុននឹងធ្វើដំណើរផ្សងព្រេងទៅប្រទេសឥណ្ឌា ដែលនៅទីនោះ Steve បានរៀនតមអាហារសាច់ និងហូបតែបន្លែ។ នៅឆ្នាំ ១៩៩១ គាត់បានរៀបការជាមួយស្រ្តីអាមេរិកាំង ម្នាក់តាមរបៀបពុទ្ធសាសនា និងមានកូនបីនាក់។

បន្ទាប់ពីត្រលប់មកឥណ្ឌាវិញ ក្នុងវ័យ ២១ឆ្នាំ Steve Jobs និងSteve wozniak បានយកកន្លែងចតរថយន្ត ក្នុងផ្ទះរបស់ ធ្វើជាកន្លែងផលិតកុំព្យូទ័រmacintoch។ Steve Jobs បានដាក់ឈ្មោះ ក្រុមហ៊ុនថា Apple ប្រែថាផ្លែប៉ោម មកពីApple ជាផ្លែឈើដែលគាត់ចូលចិត្តជាងគេ។ ក្នុងឆ្នាំ ១៩៧៦ Steve លក់ដាច់យ៉ាងរហ័ស កុំព្យូទ័រ ៥០គ្រឿងដែលSteve wozniak ផលិតចេញបាន។ កុំព្យូទ័រឈ្មោះ Apple IIដែលSteve ទាំងពីរផលិតចេញបានមានលក្ខណៈខុសពីកុំព្យួទ័រដទៃទៀត ដោយទាំងអេក្រង់ និងម៉ាស៊ីនមាននៅក្នុងប្រអប់តែមួយ។

ប៉ុន្តែ ដោយសារតែជម្លោះផ្ទៃក្នុង និងក្នុងពេលក្រុមហ៊ុនApple ជួបបញ្ហាថវិកា Steve Jobsបានដើរចេញពីក្រុមហ៊ុនApple នៅឆ្នាំ ១៩៨៥។ នៅក្នុងក្រុមហ៊ុនApple Steve Jobsត្រូវបានបុគ្គលិករិះគន់ថា ជាថៅកែផ្តាច់ការ និងខ្វះបទពិសោធន៍ផ្នែកគ្រប់គ្រង។ អ្នកជំនាញពីខាងក្រៅក៏ត្រូវគេជួលយកដំណើរការក្រុមហ៊ុន នៅជំនាន់នោះ។

នៅពេលដើរចេញពីApple Steve Jobs បានបង្កើតក្រុមហ៊ុនកុំព្យូទ័រ មួយទៀត ឈ្មោះ Next និងក្រុមហ៊ុនផលិតភាពយន្តឈ្មោះPxar។ Toy Stroy កុនគំនូរជីវចល ដ៏ល្បី បានធ្វើឲ្យក្រុមហ៊ុនផលិតភាពយន្តរបស់ Steve Jobs រកប្រាក់ចំណេញដល់ទៅ៣៥០លានដុល្លារ។

Steve Jobs លើកបង្ហាញIpad ដែលលទ្ធផលនៃគំនិតច្នៃប្រឌិតថ្មី

©Reuters

នៅឆ្នាំ ១៩៩៧ ក្រុមហ៊ុនApple បានទិញក្រុមហ៊ុនNext ក្នុងតម្លៃ ៤០០លានដុល្លារ និងហៅ Steve Jobsឲ្យត្រលប់ចូលវិញ។ នៅពេលត្រលប់ចូលApple វិញ Steve Jobsបានរកប្រាក់ចំណេញឲ្យក្រុមហ៊ុន តាមរយៈ ការកាត់បន្ថយគម្រោងមិនបានការ និងផ្តោតទៅលើការបង្កើតថ្មី ដើម្បីទាក់ទាញអតិថិជនក្នុងទីផ្សារអេឡិចត្រូនិក។ នៅឆ្នាំ ២០០១ Steve Jobsដែលបានប្រមែប្រមូលគំនិតពីអ្នកសិល្បៈ បានបង្កើតចេញIpod ឧបករណ៍ស្តាប់ចម្រៀងដ៏ពេញនិយម។

Steve Jobsដឹងថា ខ្លួនមានជម្ងឺមហារីកលំពែងតាំងពីឆ្នាំ ២០០៣ ប៉ុន្តែ ទើបតែសម្រេចចិត្តធ្វើការវះកាត់ នៅឆ្នាំ ២០០៤។ នៅឆ្នាំ ២០០៧ ក្នុងរូបរាងកាយដ៏ស្គម ដោយសារជម្ងឺ Steve Jobs នៅខំប្រឹងបង្ហាញខ្លួន ជាសាធារណៈ ដើម្បីសម្ពោធដាក់លក់ Iphone។ ស្ថានភាពជម្ងឺរបស់ Steve Jobs កាន់តែដុនដាប រហូតធ្វើឲ្យគាត់លាចេញពីតំណែងប្រធានAppleនៅដើមឆ្នាំ ២០១១។ លើកចុងក្រោយដែលគេឃើញគាត់ចេញមុខជាសាធារណៈ គឺនៅពេលគាត់ឡើងបង្ហាញពីលទ្ធផលនៃគំនិតបង្កើតថ្មី របស់គាត់មួយទៀត ម៉ាស៊ីនIpad 2។

ខុសពីមហាសេដ្ឋីដទៃទៀត ដូចជាBill Gate Steve Jobs មិនមានទ្រព្យសម្បត្តិជាប់ខ្លួនច្រើនទេ។ ប្រាក់ចំណេញទាំងអស់ (៨,៣ពាន់លានដុល្លារ)ត្រូវគាត់ដាក់ចូលទៅក្នុង ការវិនិយោគ និងភាគហ៊ុនរបស់Appleគ្មានសល់។ Steve Jobs ជាមនុស្សម្នាក់ដ៏កម្រ គឺជឿតែលើសមត្ថភាពរបស់ខ្លួនឯង និងមានអធ្យាស្រ័យតិចតួចណាស់ ទៅលើអ្នកណាដែលមិនយល់ស្របជាមួយគាត់។ សមត្ថភាពដ៏អំណោយផលមិនអាចប្រកែកបានរបស់គាត់ គឺអាចមើលទាយ ដឹងមុនពីទីផ្សារ និង ខុសពីអ្នកដទៃ គាត់មានកែវភ្នែក ចេះមើលឃើញផលិតផលបង្កើតថ្មី ដែលអាចទាក់ទាញចំណូលចិត្តរបស់អតិថិជន។ Steve Jobsធ្លាប់និយាយថា “អ្នកមិនអាចត្រឹមតែសួរអតិថិជនពីអ្វីដែលពួកគេចង់បាន និងផលិតរបស់នោះសម្រាប់ពួកគេទេ។ ជាមួយនឹងពេលវេលា និងការរីកចម្រើនទៅមុខនៃបច្ចេកវិទ្យា អតិថិជនចង់បានរបស់អ្វីមួយដែលថ្មី”៕

Oct 4, 2011

ភាពមិនស៊ីសង្វាក់នៃជំនឿលើព្រះពុទ្ធសាសនានិងបញ្ហាក្នុងសង្គមកម្ពុជា

ដកស្រង់ចេញពីវិទ្យុបារាំងអន្តរជាតិ (RFI) ពុធ 28 កញ្ញា 2011

ព្រះសង្ឃពុទ្ធសាសនាខ្មែរ

Reuters

ដោយ ប៉ែន បូណា

ព្រះពុទ្ធសាសនាដែលជាសាសនារបស់រដ្ឋ បានទទួលការគោរពប្រតិបត្តិពីសំណាក់គ្រួសារខ្មែរទូទៅដែល ជាពុទ្ធសាសនិកជនដោយគ្មានអ្នកណារំលងឡើយ។ ជាក់ស្តែងនៅក្នុងពិធីបុណ្យភ្ជុំបិណ្ឌម្តងៗ គេជឿជាក់ថា គ្មានគ្រួសារខ្មែរណាដែលមិនបានទៅវត្តឡើយទោះជាអ្នក នោះជាអ្នកមានឬអ្នកក្រក្តី។ ប៉ុន្តែ ប្រសិនបើគេឆ្លុះបញ្ចាំងពីបញ្ហានៅក្នុងសង្គមកម្ពុជា បច្ចុប្បន្នធៀបទៅនឹងតម្លៃនៃព្រះពុទ្ធសាសនា គេនឹងឃើញថា មនុស្សជាច្រើន ហាក់ដូចជាគោរពព្រះពុទ្ធសាសនាតែសម្បកក្រៅ តែមិនបានផុសចេញពីទឹកចិត្ត និងជំនឿពិតប្រាកដឡើយ។ តើហេតុអ្វីបានជាដូច្នេះ?

   រយៈពេល១៥ថ្ងៃនៃពិធីបុណ្យកាន់បិណ្ឌ និងភ្ជុំបិណ្ឌ បានបិទបញ្ចប់ហើយកាលពីថ្ងៃអង្គារម្សិលមិញ។ ទីវត្តអារាមនីមួយៗមានសភាពមមាញឹកយ៉ាងខ្លាំងក្នុងការទទួល ពុទ្ធបរិស័ទ។ មនុស្សម្នានៅគ្រប់ទិសទីសម្រុកនាំគ្នាទៅវត្តដើម្បីឆ្លងបុណ្យ ភ្ជុំបិណ្ឌ។ ព្រឹត្តិការណ៍នេះបានបង្ហាញថា ពលរដ្ឋខ្មែរមានជំនឿមុតមាំណាស់លើព្រះពុទ្ធសាសនា លើអំពើបុណ្យបាប និងលើទស្សនៈ«កម្ម ផល»ដែលជាស្នូលនៃព្រះពុទ្ធសាសនា។

    ប្រសិនបើគេពិនិត្យមើលអំពីភាពមមាញឹកនៃទីវត្តអារាមក្នុងពិធីបុណ្យ ឆ្លងភ្ជុំបិណ្ឌ គេប្រហែលជាពិបាកនឹងជឿណាស់ថាសង្គមកម្ពុជាមានបញ្ហាចាក់ស្រេះ រាប់រយជំពូកយ៉ាងដូច្នេះឡើយពីព្រោះថា ព្រះពុទ្ធសាសនាដែលបង្កប់ដោយទស្សនៈវិជ្ជាដ៏មានតម្លៃត្រូវបានមនុស្ស ទាំងពួងជឿជាក់ និងគោរពប្រតិបត្តិគ្រប់ៗគ្នា។ ទស្សនៈវិជ្ជាដំបូងដែលមនុស្សទូទៅបានស្គាល់បំផុតនោះគឺ « អំពើល្អ ទទួលផលល្អ, អំពើអាក្រក់ ទទួលផលអាក្រ់» បើទោះជាមិនមែនជាតិនេះក៏ជាតិខាងមុខដែរ។ ប៉ុន្តែ ប្រទេសកម្ពុជាបែរជាជួបនឹងសង្គ្រាមវិនាសកម្ម និងវិបត្តិតូចធំមិនចេះចប់មិនចេះហើយទាល់តែសោះ។

    ក្រុមអ្នកវិភាគតាមដានសង្គមកម្ពុជាបានមើលឃើញហេតុផលសំខាន់២ដែល គួរពិចារណា។ ហេតុផលទី១គឺប្រជាពុទ្ធបរិស័ទមួយចំនួនគោរពប្រតិបត្តិសាសនាដោយមិន បានយល់ពីខ្លឹមសារនៃព្រះពុទ្ធឱវាទឲ្យបានច្បាស់លាស់ឡើយ។ ជាការពិត សាសនាអ្វីក៏ដោយ ក៏សុទ្ធតែមានគោលដៅតម្រង់ទិសមនុស្សឲ្យប្រព្រឹត្តអំពើល្អដូចៗ គ្នា។ ប៉ុន្តែ បញ្ហានៅត្រង់ថា អ្នកដែលតាំងខ្លួនគោរពបូជាសាសនាមួយចំនួនមិនបានប្រតិបត្តិសាសនា ឲ្យបានត្រឹមត្រូវឡើយដោយហេតុតែមិនយល់ ហើយក៏ប្រែក្លាយខ្លឹមសារនៃសាសនាឲ្យទៅជាប្រការដទៃ។ ហេតុផលទី២គឺ មនុស្សមួយចំនួនទៀតគ្រាន់តែយកសាសនាធ្វើជាខែល តែខ្លួនមិនបានជឿជាក់ចេញពីបះដូង និងមិនបានអនុវត្តតាមខ្លឹមសារពុទ្ធសាសនាពិតប្រាកដឡើយ។

    មានទស្សនៈវិជ្ជាច្រើនយ៉ាងដែលគេអាចទាញយកបានជាប្រយោជន៍ពី ព្រះពុទ្ធសាសនាសម្រាប់កសាងសង្គមមួយប្រកបដោយភាពសុខដុមរមនា។ គ្រាន់តែឆ្លុះបញ្ចាំងពីពិធីបុណ្យភ្ជុំបិណ្ឌតែមួយក៏គេអាចមើល ឃើញខ្លឹមសារសំខាន់ៗជាច្រើនដែរសម្រាប់ឲ្យមនុស្សប្រព្រឹត្តតែអំពើ ល្អ ស្គាល់បុណ្យ និងស្គាល់បាបដែរ។ ប៉ុន្តែ ទស្សនៈវិជ្ជាសំខាន់ៗទាំងនោះច្រើនតែត្រូវបានគេបំភ្លេចចោលនៅ ក្រោយពេលចេញពីវត្ត។

   ការអនុវត្តផ្ទុយពីគន្លងព្រះពុទ្ធសាសនាមិនមែនមានត្រឹមតែក្នុង ចំណោមបុគ្គលសាមញ្ញប៉ុណ្ណោះទេ តែក៏មានដែរក្នុងចំណោមអ្នកដែលតាំងខ្លួនជាអ្នកមានសីលខ្លះ និងរហូតដល់ព្រះសង្ឃមួយចំនួនផង។ បញ្ហាចាក់ស្រះក្នុងសង្គមកម្ពុជាបច្ចុប្បន្ន និងជម្លោះក្នុងទីវត្តអារាមដែលកើតមានជាហូរហែគឺជាឧទាហរណ៍ ជាក់ស្តែង។

    ត្រង់ចំណុចនេះ អ្វីដែលគួរឲ្យកត់សម្គាល់គឺ សកម្មភាពដែលបានសម្តែងឲ្យឃើញពីការគោរពបូជាព្រះពុទ្ធសាសនា ហាក់មិនស៊ីសង្វាក់គ្នាទាល់តែសោះទៅនឹងបញ្ហាចាក់ស្រេះនៅក្នុង សង្គម។ នៅក្នុងព្រះពុទ្ធសាសនា ជំនឿដែលជាកុសលពិតប្រាកដគឺជាជំនឿដែលផុសចេញពីទឹកចិត្តបរិសុទ្ធ និងប្រកបដោយបញ្ញា តែមិនមែនជាការសម្តែងឲ្យឃើញខាងក្រៅឡើយ។
ក្នុងន័យនេះ ប្រជាពុទ្ធបរិស័ទទាំងឡាយគួរតែនាំគ្នាពិចារណាឡើងវិញអំពីទង្វើ របស់ខ្លួនម្នាក់ៗថា ខ្លួនបានប្រព្រឹត្តស័ក្តិសមជាពុទ្ធសាសនិកជនហើយឬនៅ? បើនៅ គួរកែតម្រូវជាបន្ទាន់។

    ព្រះពុទ្ធសាសនាបានបង្រៀនថា មនុស្សកើតមកមានតែខ្លួនទទេស្អាត ស្លាប់ទៅវិញក៏មិនអាចយកអ្វីតាមខ្លួនបានដែរក្រៅតែពីសម្ពាយ បុណ្យនិងបាប។ ដូច្នេះ សម្រាប់អ្នកដែលមានជំនឿលើព្រះពុទ្ធសាសនាពិតប្រាកដ គ្មានការចាំបាច់អីដែលមនុស្សត្រូវប្រកាប់ប្រចាក់គ្នាដើម្បីបំពេញ ភាពលោភលន់ហួសហេតុរបស់ខ្លួនឡើយ៕

Oct 3, 2011

សៀវភៅដែលចោទខៀវ សំផន

ដកស្រង់ចេញពីវិទ្យុបារាំងអន្តរជាតិ (RFI) សុក្រ 30 កញ្ញា 2011

សៀវភៅដែលចោទខៀវ សំផន

ដោយ តាន់ ហ្សង់-ហ្វ្រង់ស្វ័រ

Khieu Samphan et les Khmers rouges ឬ«ខៀវ សំផននិងពួកខ្មែរក្រហម» គឺជាចំណងជើងនៃសៀវភៅដែលទើបតែចេញលក់ នៅប្រទេសបារាំងកាលពីថ្ងៃព្រហស្បតិ៍ទី២៩កញ្ញាម្សិលមិញ។ សៀវភៅសរសេរជាភាសាបារាំងមួយនេះរបស់លោកRaoul Marc Jennar គឺជាប្រតិកម្មមួយឆ្លើយតបទៅនឹងអ្វីដែលអ្នកនិពន្ធហៅថា«ជាការ ភូតភរកុហកសុទ្ធសាធ» និងជាការសើរើប្រវត្តិសាស្រ្តពីសំណាក់មេខ្មែរក្រហមខៀវ សំផននិងមេធាវីរបស់ខ្លួនហ្សាក់ វែរហ្សែស(Jacques Vergès)។

សៀវភៅ របស់Raoul Marc Jennar គឺជាសម្រែកមួយប្រឆាំងនឹងមេខ្មែរក្រហមខៀវ សំផន គឺជាការឆ្លើយតបរបស់អ្នកឯកទេសម្នាក់ដែលចេះចាំស្ទាត់ ប្រវត្តិសាស្រ្តខ្មែរទៅនឹងសេចក្តីថ្លែងការណ៍និងការសរសេរផ្សេងៗ របស់ខៀវ សំផន ប៉ុន្មានឆ្នាំចុងក្រោយនេះ។ ពីព្រោះ ក្នុងពេលរង់ចាំទទួលការកាត់ទោស អតីតប្រមុខរដ្ឋនៃរបបខ្មែរក្រហមរូបនេះបានថ្លែងនិងបានសរសេរ ដោះសាម្តងហើយម្តងទៀតថា ខ្លួនមិនបានដឹងអ្វីទាល់តែសោះ អំពីការកាប់សម្លាប់រង្គាល និងមិនបានរួមចំណែកសោះឡើយក្នុងការសម្រេចនិងការអនុវត្តន៍បន្ទាត់ នយោបាយធំៗនៃរបបកម្ពុជាប្រជាធិបតេយ្យ។

ខៀវ សំផនបានប្រកែកដោះសាថា ខ្លួនមិនមែនជាមេខ្មែរក្រហមទេ តែជាបញ្ញវន្តម្នាក់ដែលបានបង្ខំចិត្តចាកចេញពីភ្នំពេញទៅជ្រក ក្រោមកិច្ចការពាររបស់ពួកមេខ្មែរក្រហមនៅក្នុងព្រៃតែប៉ុណ្ណោះ។

ទាំង នេះសុទ្ធសឹងជាពាក្យភូតភរកុហក បើយោងទៅតាមRaoul Marc Jennar។ អ្នកនិពន្ធសៀវភៅ«ខៀវ សំផននិងពួកខ្មែរក្រហម»ដែលយកឯកសារនិងទឡ្ហីករណ៍ជាមូលដ្ឋាន បានសរសេរលាតត្រដាងថា ខៀវ សំផនជាមេកុម្មុយនិស្តសុទ្ធសាធ ដ្បិតជាសមាជិក និងក្រោយមកទៀតជាប្រធាននៃក្រុមនិស្សិតខ្មែរMarx-Lénineនិយមនៅ ទីក្រុងប៉ារីស ជាសមាជិកនៃបក្សកុម្មុយនិស្តបារាំងក្នុងទសវត្សរ៍ទី៥០ ជាមុខមាត់ស្របច្បាប់ ពោលគឺជាតំណាងរាស្រ្ត ដូច ហ៊ូ យន់ និងហ៊ូ នឹម ដែលបម្រើបក្សកុម្មុយនិស្តកម្ពុជាមិនស្របច្បាប់ក្នុងទសវត្សរ៍ទី៦០ ស្គាល់ប៉ុល ពត តាំងពីទសវត្សរ៍ទី៤០ ស្និទ្ធនឹងប៉ុល ពតតាំងពីដើមដល់ចប់និងមានផ្នត់គំនិតមនោគមវិជ្ជា និងនយោបាយដូចប៉ុល ពតបេះបិទ។

មិនតែប៉ុណ្ណោះ សម្រាប់Raoul Marc Jennar ខៀវ សំផនជាខួរក្បាលរបស់ប៉ុល ពត ដោយហេតុថានយោបាយដែលរបបកម្ពុជាប្រជាធិបតេយ្យបានអនុវត្ត រួមមានជាអាទិ៍ការប្រែក្លាយប្រជាជនសឹងទាំងស្រុងនៅទូទាំងប្រទេស ឲ្យទៅជាកសិករ នយោបាយខ្លួនទីពឹងខ្លួន ការបង្កើតសហករណ៍ និងការប្រែក្លាយរាល់សម្បត្តិនិងមធ្យោបាយឯកជនឲ្យទៅជាកម្មសិទ្ធិ សមូហភាពទាំងស្រុង សុទ្ធសឹងជាគោលគំនិតដែលខៀវ សំផនបានសរសេរនៅក្នុងនិក្ខេបបទថ្នាក់បណ្ឌិតរបស់ខ្លួននៅឆ្នាំ ១៩៥៩។

Raoul Marc Jennar បានជម្រុញការវិភាគរបស់គាត់ទៅឆ្ងាយជាងនេះទៅទៀត ដោយអះអាងថា ការយកទ្រឹស្តីរបស់ខៀវ សំផន មកធ្វើជាស្នូលនយោបាយ មកអនុវត្តទាំងងងឹតងងល់បែបនេះ គឺជាបុព្វហេតុមួយសំខាន់នៃការបណ្តាលឲ្យស្លាប់មនុស្សច្រើនដល់ ម្ល៉ឹង។ ត្រង់នេះ ខៀវ សំផនបានទាំងសរសេរនៅក្នុងនិក្ខេបបទរបស់ខ្លួនថាអ្វីដែលគួរឲ្យ តម្លៃ«គឺមិនមែនបុគ្គលទេ តែគឺជាតិទៅវិញទេ» បានន័យថា ស្លាប់មនុស្សក៏ស្លាប់ទៅចុះឲ្យតែជាតិរស់។

ស្រោចស្រង់ ជាតិ ការពារបូរណភាពទឹកដី…នេះហើយសុទ្ធសឹងជាមូលហេតុ បើយោងទៅតាមសំដីរបស់ ខៀវ សំផន ដែលបានជម្រុញឲ្យខ្លួនគាត់ដើរតាមនិងគាំទ្រពួកខ្មែរក្រហមដែល គាត់យល់ឃើញថា ជាកម្លាំងស្នេហាជាតិតែមួយគត់។
Raoul Marc Jennar ដែលពឹងផ្អែកទៅលើឯកសារជាច្រើន លាតត្រដាងថារាល់សេចក្តីសម្រេចចិត្តធំៗនៃរបបកម្ពុជាប្រជាធិបតេយ្យ សុទ្ធតែត្រូវបានធ្វើឡើងដោយមានការចូលរួមនិងការគាំទ្រពិត ប្រាកដពីសំណាក់ខៀវ សំផន។

ខៀវ សំផនតែងតែតាំងខ្លួនជាអ្នកស្នេហាជាតិ។ តាមរយៈសេចក្តីថ្លែងការណ៍ និងបទសម្ភាសន៍ផ្សេងៗ ជាអាទិ៍ជាមួយវិទ្យុRFI ខៀវ សំផនតែងតែអះអាងថា អ្វីដែលខ្លួនបានធ្វើគឺមានគោលដៅតែមួយគត់នោះគឺស្រោចស្រង់ជាតិ។

Raoul Marc Jennar សរសេរឆ្លើយតបនៅក្នុងសៀវភៅរបស់គាត់ទៅខៀវ សំផនវិញថា «សូមកុំឲ្យប្រជាជនក្នុងពិភពលោកជួបអ្នកសេ្នហាជាតិដូចខៀវ សំផនឲ្យសោះ» ពីព្រោះពាក្យស្នេហាជាតិ សម្រាប់មនោគមវិទូខ្មែរក្រហមរូបនេះ គឺ«ប្រែក្លាយប្រជាជនខ្លួនឲ្យទៅជាទាសករ បង្អត់អាហារប្រជាជនខ្លួននិងសម្លាប់ចោលទាំងអស់អ្នកណាក៏ដោយដែល មិនមានគំនិតដូចខ្លួន»។

មិនតែប៉ុណ្ណោះ Raoul Marc Jennar សរសេរថា ការស្នេហាជាតិរបៀបខៀវ សំផន ក៏ដូចការស្នេហាជាតិរបៀបពួកមេខ្មែរក្រហមដទៃទៀតដែរ គឺជាគំនិតដែលមនុស្សជាតិមិនត្រូវការទេ ដ្បិតវាមានមូលដ្ឋាននៅលើពូជសាសន៍ នៅលើការប្រកាន់ពូជសាសន៍ នៅលើការសម្រាំងយកតែពូជសាសន៍ខ្មែរសុទ្ធសាធ និងវាមានមូលដ្ឋាននៅលើការអាឡោះអាល័យចំពោះដែនដីសម័យអង្គរដែលបាន បាត់បង់ជាច្រើនសតវត្សរ៍កន្លងមកហើយ។ អ្នកនិពន្ធបន្ថែមថា គំនិតស្នេហាជាតិរបៀបខ្មែរក្រហម របៀបខៀវ សំផន ដូចមានឧទាហរណ៍ជាច្រើននៅក្នុងប្រវត្តិសាស្រ្តស្រាប់ តែងតែនាំទៅរកសង្គ្រាមទៅរកការកាប់សម្លាប់រង្គាល។

ក្រៅ ពីនេះ នៅក្នុងសៀវភៅដែលមានចំណងជើងថា Khieu Samphan et les Khmers rouges ចេញផ្សាយដោយគ្រឹះស្ថានបោះពុម្ភDemopolis, Raoul Marc Jennar ចោទខៀវ សំផនចំតែម្តងថា បានសម្រេចដោយចេតនាក្នុងការយកកេរ្តិ៍ឈ្មោះដ៏ល្អរបស់ខ្លួន ក្នុងនាមជាបញ្ញវន្តប្រកបដោយកិត្យានុភាពខ្ពស់ ក្នុងនាមជាអ្នកសារព័ត៌មានប្រកបទៅដោយឥទ្ធិពលខ្លាំង និងក្នុងនាមជាអ្នកតំណាងរាស្រ្តសែនសាមញ្ញដែលរាស្ត្រស្រឡាញ់និង គោរព ទៅបម្រើទ័ពព្រៃកុម្មុយនិស្តសាហាវយង់ឃ្នង និងរបបនយោបាយថោកទាប ព្រៃផ្សៃនិងអមនុស្សធម៌របស់ប៉ុល ពត៕

Pages

WITH ME

Like WITH ME

Oct 7, 2011

Steve Jobs បិតាបង្កើតIphone Ipod Ipad ស្លាប់ក្នុងវ័យ៥៦ឆ្នាំ

Oct 4, 2011

ភាពមិនស៊ីសង្វាក់នៃជំនឿលើព្រះពុទ្ធសាសនានិងបញ្ហាក្នុងសង្គមកម្ពុជា

Oct 3, 2011

សៀវភៅដែលចោទខៀវ សំផន

Comment about my Post

About Me

My Content

Popular Posts

Blog Archive

RFA News

Contact

Blogroll

Facebook Badge

RFI News

ចំនួនអ្នកចូលទស្សនា

Pages

WITH ME

Like WITH ME

Oct 7, 2011

Steve Jobs បិតា​បង្កើត​Iphone Ipod Ipad ស្លាប់​ក្នុង​វ័យ​៥៦​ឆ្នាំ

Oct 4, 2011

ភាពមិនស៊ីសង្វាក់នៃជំនឿលើព្រះពុទ្ធសាសនានិងបញ្ហា​ក្នុង​សង្គម​កម្ពុជា​

Oct 3, 2011

សៀវភៅដែលចោទខៀវ សំផន

Comment about my Post

About Me

My Content

Popular Posts

Blog Archive

RFA News

Contact

Blogroll

Facebook Badge

RFI News

ចំនួនអ្នកចូលទស្សនា

Steve Jobs បិតាបង្កើតIphone Ipod Ipad ស្លាប់ក្នុងវ័យ៥៦ឆ្នាំ

ភាពមិនស៊ីសង្វាក់នៃជំនឿលើព្រះពុទ្ធសាសនានិងបញ្ហាក្នុងសង្គមកម្ពុជា